GUPNA KI TAN THEI MAW KI TAN THEILO

Gupna ki tan thei maw ki tan theilo? Kuate in gupna ngah ding a kuate in gupna ngahlo ding?Gupna ki tan thei hi banghang in ki tan thei hiam cih Pasian kammal tawh en ding hi hang.

MAWHNA BAWL PEUPEUH MAWHNA SILA

Johan 8:34

34. Tua ciangin Jesuh in, “A mantakin ci lehang mawhna a bawl mi peuhmah mawhna’ sila ahi uh hi.

Mawhna thaman sihna ahi hi, a mawh peupeuh mawhna sila ahih manin a tha man sihna ahi hi. Zeisu um in gumpa leh honpa in sangin kisik kik in Zeisu min in ki tuiphum in Kha Siangtho ngah in mawhna mai hi. Mawhna mai khin Zeisu tawh ki tuiphum sikhawm in mawhna i bawl lai veve leh mawhna thaman sihna ahi hi. Tua ahih manin mawhna a bawl peuhpeuh mawhna sila ahi hi.

PASIAN THU THEIKHIN SANGKHIN IN A KHAWLKIKTE ADING KISIKIK THEIHNA DING LAMPI OM NAWNLO

Hebru 6:4-6

4. A tawpkik khinsate a kisik kik nadingin kibawl zo lo hi.

5. Pasian’ khuavak sungah amaute om khinin, vantung nopna ciam khinin, Kha Siangtho ngah khinin, Pasian’ thu a hoihna phawk khinin, a hong tung ding vangliatna thu zong thei khin uh ahih manin,

6.amaute a tawpkik leh, amau utthu tawh singlamteh tungah Pasian’ Tapa thatkikin a zumhuai dingin a pholak kikkik suak uh ahih manin a kisik theih nading uh lampi om nawn lo hi. TDB

Piangthak khinsa thuman thutak theih khinsa vantung gam nopna ciam khinsa leh Pasian hehpihna mu in Kha Siangtho zong ngah khinsa te a nungtolh leh amaute ut thu tawh Zeisu that kik in sisak kik a, a zumhuai in bawl kik uh ahih manin nih veina ki sikkik theihna ding lampi om nawn lo hi. Zeisu khat vei bek si a sikik kik ngei nawnlo ding hi. Zeisu hong gupkhiatna in khatvei tawh tawntung hotkhiatna nuntakna hong tun ahi hi.

KI SIKKIK HANG PIANGTHEI NAWNLO

‭‭Hebru ‭12:16-17‬

16. Numei tawh a mawh mite suakkha kei unla, Esau bangin annek khat tawh innluah za a zuak mi na suahkhak loh nadingun kidawm un.

17. Bang hang hiam cih leh Esau in a pa kiang panin thupha ngahkik nuamin khitui naptui tawh a nget hangin a gamtatnasa a bawlkik theih nading lampi om nawn lo ahih manin bangmah ngahthei tuan nawn lo hi. TDB

Zeisu hong gupkhiatna thu neu ngaihsut kei un mawhna bawl phamawh saklohna hang tawh Esau bangin an kam khat tawh gam luahza thupit ngaihsut lo in a zuak bangin a kisik kik hang ki khel theihnawn lo piang thei nawnlo hi. 

Tua mah bangin Pasian in Zeisu Khrih tawh gam luah dingin mawhna pan ama pumpi leh sisan ngiat tawh hong tat khiatna neu ngaihsut in i thupi sim kei leh mawhna mai theihna ding gam luahza ngah theihna ding khitui naptui tawh i thumthum i tautau hangin kisikkik hangin hi thei nawnlo piang thei nawnlo ding hi. Tua ahih manin gam luahza gupna ki tan thei hi hoihtak in thupit sim ding ahi hi.

THEI PIPI A MAWHNA BAWL LAI VEVE LEH PHULAKNA

Hebru 10:26-31

26. Thuman thutak i theih khit ciangin mawhna i bawl hamtang lai leh i mawhna a kimaisak nadingin biakpiakna dang om nawn lo a,

27. a kihtakhuai thukhenna le Pasian’ thu a nial mite a kangtum ding meikuangpi bek omlai hi.

28. Moses Thukham a zui lote pen mi nih le thum in mawh mah hi, ci-in teci a pan’ khit nakleh kihehpih hetloin sihna kithuaksak hi.

29. Tua bang ahihleh Pasian’ Tapa a simmawh, mawhna a hong maisak Pasian’ thuciamna sisan a thudon lo, Pasian’ hehpihna a hong puak Kha Siangtho a hehsakte’ thuak ding bangzah takin lianzaw kan ding ahi hiam?

30. Bang hang hiam cih leh, “Phulakna keima a’ hi a, ka thukkik ding hi,” a ci pa le, “Topa in ama mite thu a khen ding,” a ci pa i theih ahi hi.

31. A nungta Pasian’ khut sungah thumang loin i tunkhak ding a lauhuai mahmah ahi hi. TDB

Thuman thutak thei in a sia a pha thei khin na pi in mawhna bawl teitei lai leh Pasian hehna a kihtak huai thu khenna Hell meikuangpi bek omlai hi. Moses tungtawn hong kipia thukham a zuilo a mawhte mi nih leh thum in mawh hi cih theihpihna a om nak leh kithat in hehpihna ki neilo ahih leh hih Zeisu gupna thu thudonlo in omleng Pasian hehna kua in thuakzo ding ahi hiam.

Zeisu hong tatkhiatna sisan a langpang a simmawh a thupi donlo suak ahih manin Pasian in phulakna pen kei ma a hi ci hi. Tua thukhen ding Zeisu ahi hi. Tua ahih manin a nungta Pasian thu manglo in i om ding pen a lauhuai taktak thu ahi hi.

EITE A NUNGKIKTE HILO IN A NUNGKIK A OMLEH PASIAN LUNGKIMLO DING

Hebru 10: 38-39

38. Ahi zongin keima mi a thuman mite in ka thu umin nungta ding uh a, a nungkik a om uhleh tua mite tungah ka lungkim kei ding hi,” na ci hi.

39. Eite pen nungkikin a maimang mite ihi kei a, upna nei-in hotkhiatna a ngah mite ihi hi. TDB

Thuman thutak thei in a piangthak te in Pasian thu zui in nungta ding uh hi ci hi, a zuilo a nungtolh te ahih leh a maute tungah ka lungkim kei ding hi Topa Pasian in ci hi. Eite a nungtolh a nungkin te hilo ihih manin Zeisu gupkhiatna a um a muang a lamente i hih manin hih lametna kiptak in upna tawh zungkha in i letkip tawntung ding ahi hi.

A TAWP DONG A THUAKZOTE KIHON KHIA DING

Marka 13:13

13. Keima hangin Gentail mi khempeuh in note hong mudah ding uh a, ahi zongin a sih dongun a thuakzote in hotkhiatna a ngah ding uh hi. TDB‬‬

Zeisu Khrih min hangin bawlsiatna kosiatna zumna daina haksatna te leh na khempeuh ah citak takin a thuakzo a zuizo te bek suakta ding uh hi ci hi. Zeisu nung zuihna ah sih dongin thuakzawh thuakngam ding kisam hi tua bamg a thuakzo te bek suakta ding uh ci hi.

KAMSANG KINEIHKHEM LEH THUMAN THUTAK PHAMAWH A SALO SIATE

2 Peter 2:1

1.Mite lakah kamsang man lo a omngei mah bangin note lakah sia man lo hong om ding hi. Siatna a piangsak thei thuhilhna a man lo hong lutpih simin, amaute mahmah a tankhia Topa nangawn nial ding uh hi. Tua ahih manin thakhat thu-in siatna thuaklawh ding uh hi. TDB

Mite lak ah kamsang ki neihkhem mi tampi om khinta hi. Thuman thutak sangin Leitung thute bek kigen zaw hi tha kingah zaw hi. Zeisu thu ki gen nawnlo in Leitung thu Leitung pilna tawh mi tampi lampi ki khialsak hi.

Lai Siangtho thu upmawh deihkaih thu tawh lehkaih in siatna lam ah tun in Kha Siangtho neilo pi in Pasian thu ki manglo pi dingin mawk gengen uh hi. Hih bang kamsang siate in thakhat thu in siatna nakpi tung ding uh hi ci hi. Hih bang mite tungah Pasian in a thuak ding uh liansak zaw ding hi ci hi.

KHA SIANGTHO A GENSIATE KI MAISAK NGEILO

Matthai 12:31

31. Tua ahih manin note kiangah kong genin-ah: Mihingte’ kampau khialhna le gamtat khialhnate kimaisak thei ding a, ahi zongin Kha Siangtho langpangin a gensiate kimaisak lo ding hi. TDB

Lai Siangtho sungah mihing Tapa a gensia te mawhna khelhna leh kampau khelhna a bawlte ki maisak ding a ahi zongin Kha Siangtho a gensia te kimai ngak ngei nawnlo ding uh hi ci hi. Mi khat peuh Pasian nasepna Kha nasepna gensia lo in hihna bang tawh om hithiat ding ahi hi. Na khempeuh ah thukhen Pasian ahi hi. Kha nasepna te i gensiat khak leh cikmah in kimaisak ngei nawnlo ding hi ci hi.

MAWHNA MAW DIKNA

Roman 6:16

16. Mi khatpeuh’ thu a mang dingin ama khut sungah na kipiak uh ciangin a thu na mante uh’ sila na hi uh hi. Mawhna na bawl uhleh sihna a thuak ding na hi uh a, thumangin na om uhleh Pasian tawh pawlkhat a suak ding na hi uh hi. TDB

Mi khat peuh a ki piakpiakna ah a suak ding uh hi, mawhna a bawl i hih leh mawhna thaman sihna hi a, Pasian thu i zuih leh diktanna ngahna ahi hi. Mawhna gamtatna in sihna lam zuan ding a, thu man in gamtatna in dik tansakna ngah ding ahi hi.

TOPA, TOPA A CI KHEMPEUH VANGAM LUTLO DING A TOPA THEIH MI HIH DING THUPI HI

Matthai 7:21-23

21. ‘Topa, Topa’ hong ci khempeuh vantung gamah a lut kim kei ding hi. Ahi hangin vantunga om ka Pa deihna banga gamtate bek a lut ding hi.

22.Tua ni ciangin mi tampi in ka kiangah, ‘Topa, Topa, nangma minin thu hilh hi lo ka hi uh hiam; nangma minin dawite hawlkhia in, nalamdang tampi bawl hi lo ka hi uh hiam?’ hong ci ding uh hi.

23.Tua ciangin, ‘Note kong thei ngei kei hi. Gitlohna a bawlte aw, kei kiang pan taikhia un!’ teltakin ka ci ding hi.ZIV

Ni tawpni ciangin Zeisu in Topa, Topa hong ci khempeuh vantung gam lutlo ding uh hi ci hi. Mite in Topa aw nang ma min tawh dawite hawlkhia ung na lamdang tampi bawl ung hong ci ding uh hi ahi zongin tua ni ciang ken note kong thei ngeikei hi ka ci ding hi ci hi.

Topa en i theih bek hilo in Topa in ei hong theih mi ihih ding thupi mahmah hi. Pasian deihna thu a zuite ihih ding thupi penpen a tuate bek vantung gam lut thei ding uh hi ci lai hi.

TUI LEH KHA TAWH SUAH KIK LOH PHAMAWH

Johan 3:5

5. Jesuh in, “A mantakin kong genin-ah, mi khatpeuh tui le Kha Siangtho tawh a suahkik kei leh Pasian’ Ukna sungah lut thei lo ding hi.TDB

Tui leh Kha tawh na suah kik kei leh Vangam ki tunglo dinghi tua ahih manin Zeisu in tui leh Kha tawh na suahkik loh phamawh hi ci hi. Leitung si leh sa tawh a suakte Leitung mi bek hi pan a, vangam mi hih theihna dingin Kha tawh suah kik loh phamawh hi tua ahih manin Zeisu in tui leh kha tawh na suahkik loh phamawh hi ci hi.

LUNGDAMNA THU UM IN TUI A KIPHUMTE SUAKTA DING

Marka 16:16

16. Lungdamna Thu umin tui a kiphum mi peuhpeuh in hotkhiatna ngah ding a, a um lo mi peuhpeuh in mawhsakna thuak ding uh hi. TDB

Zeisu hong tatkhiatna lungdamna thu um in tui a kiphum peuhpeuh in suahtakna ngah ding uh hi ci hi. Ahi zongin a umlo mi peuhmah in mawhsakna thukhena thuak ding uh hi ci hi. Hih Lungdamna thu (gospel) in bang gen hiam cih pen zuih ding sep ding man ding ahi hi. Upna pen sepna tawh zuih ding ahi hi. Tuiphumna thupi kei ee up ding bek hi cih dan ki ngahlo a a kisam bangin sep ding zuih ding thu ahi hi.

MAWH KISIKNA LEH MAWH MAINA KHA SIANGTHO NGAHNA ZEISU MIN TAWH KI TUIPHUMNA

Matthai 28:19

19. Tua ahih ciangin note pai unla, midang khempeuh, keima nungzui mi suaksakin, Pa min, Tapa min, le Kha Siangtho min tawh tui sungah na phum un. TDB

Sawltakte 2:38

38. Tua ciangin Peter in amaute kiangah, “Na mawhna uh kisik unla, na mawhna uh hong kimaisak theih nadingin Jesuh Khrih min tawh tui kiphum ciat un. Tua hileh Pasian’ piakkhong Kha Siangtho na ngah ding uh hi. TDB

Sawltakte 4:12

12. Ama hang bek tawh hotkhiatna kingah thei ding hi. Bang hang hiam cih leh eite in hotkhiatna i ngahtheih nadingin leitung khempeuhah Pasian in hong piak min dang khat zong om lo hi,” ci-in a gen hi. TDB

Matthai 1:21

21. Amah in tapa khat hong nei ding a, tua tapa in ama mite a mawhna uh panin honkhia ding ahih manin ama min dingin Jesuh na phuak ding hi,” ci-in thu a gen hi. TDB

Roman 6:3-4

3. Khrih Jesuh tawh i kipawl theih nadingin ama sungah a kiphum eite pen ama sihna mahah zong a sikhawm ihihlam thei lo na hi uh hiam?

4. I Pa’ vangliatna tawh sihna panin Khrih a kithawhkiksak mah bangin eite zong nuntakna thak i nuntak theih nadingin tui i kiphum ciangin amah tawh kiphum khawmin a sikhawm ihi hi. TDB

Mawhnei mite tawh Pasian omkhawm theilo ahih manin mawhna maitheihna dingin kisik kikloh phamawh hi. Note pai kawikawi unla Pa min, Tapa min, leh Kha Siangtho min in tui na phum un ci ahih manin tua min in Zeisu min ahi hi. Min tampi henlo a (singular) min khat bek tawh ci hi. Mi tampi in telkhial in hih thupiakna la khial thei uh hi. Zeisu tettipang a teltuam nungzupite sep bangin sep ding thu ahi hi. Leitung pilna leh upmawh thu tawh zat ding sep ding hi lo hi.

Tua ahih manin ki sikkik in Zeisu Khrih min tawh kituiphumna in mawhmaina hi a Kha Siangtho ngahna in thawhkikna ahi hi.

Zeisu Khrih minlo vannuai kici ah eite ki hotkhiatna ding min dang hong kipia omlo hi. Lai Siangtho sungah ama min pen Zeisu kiphuak ding hi ama mite a mawhna pan un honkhia ding hi ci hi.

Zeisu tawh sikhawm ki guikhawm thokik khawm hihna lahna in ki tuiphumna ahi hi.

Hotkhiatna ngahna dingin Zeisu Khrih minlo mindang hong kipia vannuai kici min dang omlo hi. 

UPNA LEH SEPNA

James 2:24,26

24. Tua ahih manin, mi khatpeuh in a upna bek tawh hi loin, a sepna tawh a kizuih ciangin Pasian tawh kipawl theihna ngah pan ahihna thu na thei uh hi.

26. Tua ahih manin hu a diik lo, hu a sang lo pumpi pen a si ahih mah bangin sepna tawh a kizom lo upna zong a si ahi hi. TDB

Gamtatna omlo upna a si ci hi, gilkial in an i nek kei leh gilvahlo a tua mah bangin sepkhiatna omlo upna a si ahi hi ci hi.. Zeisu hong gupkhiatna upna hangin dikna ki ngah ahih manin gamtatna tawh i zuih kei leh upna a mawkna hi a a si ahi hi. Zeisu i up leh mawhna kisik in gamtatna tawh zuih ding ahi hi.

PASIAN THEILO IN LUNGDAMNA THU UMLOTE THU KIKHEN DING

2 Thesalonica-te 1:8-9

8. Amah in Pasian a thei lote le i Topa Jesu lungdamna-thu a mang lote a gawt ding hi.

9. Topa ompihna pan le a vangliatna thupina panin amaute kikhenkhia dinga, tawntung siatna-in kigawt ding hi. ZIV

Pasian theilo in a thu thudonlo in Zeisu Khrih hong gupkhiatna thu umlo in a thudon lote tungah Pasian in thukhen dinga tawntung gawtna kahna leh hagawina meikuang pi sungah thuak dingin thu kikhen ding hi.

‭‭THU ZUI DING

Johan 14:15

15. Tua ciangin Jesuh in, “Kei na hong it uhleh ka thupiakte zong na zui ding uh hi.

Zeisu in kei nong it uh leh ka thupiakte na zui un ci lai hi. It ing ci in ut bangin gamtat leh a it hilo hi tua ahih manin a thu zuih ding pen itna lahna hi a gupna ngah ing ci a ut bangin gamtat pheng gawp ding ki ngahlo hi.

PASIAN BIAKINN

1 Korin 3:16-17

16. Note pen Pasian’ biakinn na hihna uh le note sungah Pasian’ Kha Siangtho a teng ahih lamtak na theihsa uh ahi hi.

17. Mi khatpeuh in Pasian’ biakinn susia leh Pasian in tua mipa susia ding hi. Bang hang hiam cih leh Pasian’ biakinn a siangtho hi a, note zong tua biakinn siangtho na hi uh hi. TDB

Note pen Zeisu Khrih sungah pumkhat hi a Pasian tenna biakinn na hi uh hi. Pasian tenna biakinn a niinsak peuh mah a sianglo a niin peuh mah ki susia in ki haltum ding hi ci hi. Tua ahih manin na pumpi Pasian biakinn ahih manin na siantho sak ding ahi hi. A niin ah Pasian om theilo a Pasian pen a siangtho ahi hi.

MI KHEMPEUH TAWH KILEM IN SIANGTHO NUNTAKNA TAWH OM DING

Hebru 12:14

14. Mi khempeuh tawh na kilem theih nading uh hanciam un. Nuntak siangtho lo tawh kuamah in Topa mu zo lo ding ahih manin nuntak siangtho na nungta un. TDB

Lai Siangtho sungah mi khempeuh tawh na kilem ding leh a siangtho nuntakna lo tawh kuamah in Topa mai mulo ding hi. Mi khempeuh tawh kilem ding tua ban ah nuntak siangtho tawh om a bangkim ah a siangtho in om ding ahi hi. Tua bang gamtatna lo tawh kua mah in Topa mai mulo ding uh hi ci hi.

LUNG HIMAWH DING OMLO HI

Ute naute aw tua ahih manin ah ‭Lai Siangtho gen bangin zuih ding ahi hi. Up mawh thu leh Leitung pilna tawh bawl tawm thute i zuih leh upna kitan ding hi. Pasian thupiak bangin i zuih kei leh gupna kitan ding hi. Tua ahih manin gupna kitan thei hi kidawm in gamtat ding ahi hi. 

Eite muhna tawh nungta hilo in upna tawh nungta in gamtang, kalsuan i hih manin ki dawmtak in nisim nuntakna ah kalsuanna ah lungduai tak leh piangthak takin, mi khempeuh tawh kilem in siangtho nuntakna tawh nungta in Kha Siangtho tawh kidim in Kha Siangtho kimaihsak in nuntak ding ahi hi. Hihte in Topa deihna hi a tua bangin nungta gamta peuh leng lung himawh ding omlo hi. Eite Topa Zeisu Khrih min a tawntung in kiphat denta hen Pa Pasian Topa Zeisu Khrih in minthanna vangliatna khempeuh tang tawntungta hen. Amen.

Published by Zomi United Church May 10, 2020